भाजपा ने गांधीनगर और ओखा नगर निगम चुनाव में बड़ी जीत हासिल की

ગુજરાતમાં સ્થાનિક સ્વરાજની ચૂંટણીમાં ભાજપના ભવ્ય વિજય બાદ પ્રદેશ પ્રમુખ જગદીશ વિશ્વકર્માએ ગુજરાતની જનતાનો આભાર માન્યો છે. તેમણે જણાવ્યું કે, ગુજરાતની જનતાએ વિકાસ અને સુશાસન પર વિશ્વાસની મહોર મારી છે. ગાંધીનગર મહાનગરપાલિકાની 44માંથી 38 બેઠકો પર ભાજપનો ભગવો લહેરાયો છે, જ્યારે ઓખા નગરપાલિકાની 36માંથી 33 બેઠકો પર ભાજપે ભવ્ય વિજય મેળવ્યો છે. આ ઉપરાંત ખેરાલુ, બાયડ અને ઉદેપુર નગરપાલિકામાં પણ ભાજપનો વિજય થયો છે.

ચૂંટણી સમયે જ દેખાતા વિપક્ષી નેતાઓને મતદારોએ જવાબ આપ્યોઃ જગદીશ વિશ્વકર્મા જગદીશ વિશ્વકર્માએ જણાવ્યું કે, આ વિજય પ્રધાનમંત્રી નરેન્દ્ર મોદીના સેવા અને સમર્પણના ભાવનું પરિણામ છે. મુખ્યમંત્રી ભૂપેન્દ્ર પટેલના નેતૃત્વમાં ગુજરાત વિકાસના માર્ગે આગળ વધી રહ્યું છે. ગાંધીનગરના સાંસદ અને કેન્દ્રીય ગૃહમંત્રી અમિત શાહ પણ સતત વિકાસકાર્યો પર નજર રાખી રહ્યા છે. ભાજપના કાર્યકર્તાઓ દિવસ-રાત જોયા વગર જનતાની વચ્ચે રહીને કામ કરે છે, જેના કારણે જનતાનો પક્ષ પરનો વિશ્વાસ વધુ મજબૂત બન્યો છે.

તેમણે વધુમાં કહ્યું કે, ચૂંટણી સમયે જ દેખાતા વિપક્ષી નેતાઓને જનતાએ મતદાન દ્વારા જવાબ આપ્યો છે. વિપક્ષ દ્વારા કરવામાં આવેલા જૂઠ્ઠા પ્રચારનો ગુજરાતની જનતાએ જડબાતોડ જવાબ આપ્યો છે. શહેરી અને ગ્રામ્ય વિસ્તારની જનતાએ ભાજપનાં વિકાસકાર્યોને સ્વીકાર્યાં છે અને ફરી એકવાર ભાજપ પરનો પોતાનો અતૂટ વિશ્વાસ સાબિત કર્યો છે.

પ્રદેશ પ્રમુખે જણાવ્યું કે, ભાજપ સરકાર રોજગાર, ખેડૂતો અને યુવાનોના વિકાસ માટે કટિબદ્ધ છે. ગુજરાતની જનતાએ સ્થાનિક સ્વરાજની ચૂંટણીમાં ભાજપને ભવ્ય વિજય અપાવીને વિકાસના રાજકારણને સમર્થન આપ્યું છે. આ ભવ્ય વિજય બદલ તેમણે ગુજરાતની જનતાનો આભાર માન્યો હતો. સાથે જ ગુજરાતની જનતાના આશીર્વાદ હંમેશાં જળવાઈ રહે તેવી માતાજીના ચરણોમાં પ્રાર્થના કરી હતી.