Asia Cup 2026: Tournament developments and team performances

ఇంటర్నెట్ డెస్క్: మహిళల ఆసియా కప్‌ (Asia Cup)లో భారత్‌ చేతిలో ఘోర ఓటమి చవిచూసినా.. పాకిస్థాన్ సెమీ ఫైనల్స్‌కు చేరింది. సోమవారం దుబాయ్‌లో తమ చివరి గ్రూప్‌ మ్యాచ్‌లో హాంకాంగ్, చైనాను పాక్‌ 72 పరుగుల తేడాతో ఓడించి సెమీస్ బెర్తును ఖరారు చేసుకుంది. ఈ మ్యాచ్ అనంతరం పాకిస్థాన్ మహిళా క్రికెట్ జట్టు ప్రధాన కోచ్ వహాబ్ రియాజ్ (Wahab Riaz) స్టేడియంలో ఉన్న పాక్ అభిమానులతో ముచ్చటించాడు. ఈ క్రమంలో ఓ అభిమాని వహాబ్‌కు ఒక అభ్యర్థన చేశాడు.

పాకిస్థాన్ అభిమానులకు ఆసియా కప్ ట్రోఫీ వద్దని, కానీ పాక్ మహిళా జట్టు భారత్‌ను ఓడించాలని విజ్ఞప్తి చేశాడు. ఈ వీడియో సోషల్ మీడియాలో వైరల్ కావడంతో.. టీమ్ఇండియా ఫ్యాన్స్ కౌంటర్ ఇస్తున్నారు. ‘‘వారు (పాక్) క్రికెట్‌ను యుద్ధంలా, యుద్ధాన్ని ఆటలా ఆడతారు. కానీ రెండు సందర్భాల్లోనూ ఓటమి శాశ్వతం’’ అని ఓ నెటిజన్ కామెంట్ చేయగా.. ‘‘మొన్న ఇచ్చిన షాక్ సరిపోలేదనుకుంటా.. ఫైనల్‌కు రండి.. ఈ సారి అంతకు మించిన ట్రీట్ టీమ్ఇండియా ఇస్తుంది’’ అని మరో యూజర్ అన్నాడు.

ఇప్పటికే భారత్, పాక్ (IND vs PAK) గ్రూప్‌లో దశలో ఒకసారి తలపడ్డాయి. ఈ చిరకాల ప్రత్యర్థులు మరోసారి తలపడే అవకాశం ఉంది. ఎందుకంటే ఈ రెండు టీమ్‌లు సెమీస్‌కు చేరాయి. అందులో విజయం సాధిస్తే ఫైనల్‌లో భారత్, పాక్ అమీతుమీ తేల్చుకుంటాయి. గ్రూప్ దశలో వరుసగా మూడు మ్యాచ్‌లు గెలిచిన హర్మన్‌ప్రీత్ సేన (Team India) సెమీస్‌కు చేరిన విషయం తెలిసిందే. మంగళవారం బంగ్లాదేశ్‌, యూఏఈ మధ్య జరిగే మ్యాచ్‌లో విజేతగా నిలిచిన జట్టుతో భారత్ సెమీ ఫైనల్ (సెప్టెంబరు 10న) ఆడుతుంది. ఇక, రెండో సెమీ ఫైనల్‌లో శ్రీలంకతో పాక్ తలపడనుంది. ఫైనల్ మ్యాచ్ సెప్టెంబరు 13న జరగనుంది.