iPhone 18 Pro Series: ఐఫోన్‌ 18 ప్రో మ్యాక్స్‌ ధర.. ₹2 లక్షలు దాటనుందా? - Eenadu

ఇంటర్నెట్‌ డెస్క్: టెక్‌ ప్రియులు ఎప్పుడెప్పుడా అని ఎదురుచూస్తున్న యాపిల్‌ ఈవెంట్‌ సమీపిస్తోంది (iPhone 18 Pro Series). సెప్టెంబర్ 9న జరిగే ఈ ఈవెంట్‌పై ఆసక్తి నెలకొంది. అధికారిక ప్రకటన రానప్పటికీ.. ఐఫోన్‌ 18 ప్రో, ఐఫోన్‌ 18 ప్రో మ్యాక్స్‌ మోడళ్లతో పాటు తొలి ఫోల్డబుల్‌ ఐఫోన్‌ రాబోతున్నట్లు వార్తలు వస్తున్నాయి. అయితే, వీటి ధరలు కూడా భారీగానే ఉంటాయని ప్రచారం జరుగుతోంది.

దేశీయ మార్కెట్‌లో ఐఫోన్‌ 18 ప్రో మ్యాక్స్‌ ప్రారంభ ధర రూ. 1.55 లక్షల నుంచి రూ.1.60 లక్షల వరకు ఉండొచ్చని టెక్‌ వర్గాలు అంచనా వేస్తున్నాయి. ఎక్కువ స్టోరేజ్‌ ఉండే టాప్‌ వేరియంట్ల ధరలు రూ.2 లక్షల మార్కును దాటే అవకాశం ఉందని భావిస్తున్నారు. అయితే, గతంలో తీసుకొచ్చిన ఐఫోన్‌ 17 ప్రో మ్యాక్స్‌ 256GB వేరియంట్‌ ప్రారంభ ధర రూ.1.49 లక్షలు కాగా, 512GB ధర రూ.1.69 లక్షలు, 1TB ధర రూ.1.89 లక్షలు, 2TB వేరియంట్‌ ధర రూ.2.29 లక్షలుగా కంపెనీ నిర్ణయించింది. ఈ ఏడాది మెమొరీ చిప్‌లు, ఇతర విడిభాగాల ధరలు భారీగా పెరిగాయి. దీంతోపాటు యాపిల్‌ TSMC కొత్త 2nm చిప్ టెక్నాలజీ ఉపయోగించిందని, కెమెరాలో మార్పులు చేసిందని వార్తలు వస్తున్నాయి. ఈ లెక్కన చూస్తే.. 17 సిరీస్‌తో పోలిస్తే 18 సిరీస్‌ ధరలు అధికంగా ఉండే అవకాశం ఉంది. దాదాపు రూ.5 వేల నుంచి రూ.20 వేల వరకు ధరలు పెరిగే అవకాశం ఉందని సమాచారం.

యాపిల్‌ తొలిసారి తీసుకొస్తున్న ఈ ఫోల్డబుల్ ఐఫోన్‌ ప్రత్యేక ఆకర్షణగా నిలుస్తోంది. దీని పేరుపై పలు ఊహగానాలు వినిపిస్తున్నాయి. ఇంతకుముందు మడతపెట్టే ఫోన్‌ను ఐఫోన్‌ అల్ర్టా అని పిలుస్తారని అంతా అనుకున్నారు. కానీ, కొత్తగా ఐఫోన్‌ డ్యూయో అని పేరు పెట్టినట్లుగా ప్రచారం జరుగుతోంది. దీనిపై కంపెనీ ఇంకా అధికారిక ప్రకటన చేయలేదు.