અમરેલીમાં 5 લોકોને ઈજા પહોંચાડનાર સિંહણનું મોત

અમરેલી જિલ્લાના વડિયા તાલુકાના અરજણસુખ અને તોરી ગામના સીમ વિસ્તારમાં એક જ દિવસમાં 5 જેટલા લોકો પર હુમલો કરી હાહાકાર મચાવનાર વિફરેલી સિંહણનું રેસ્ક્યૂ કર્યા બાદ મોત નિપજ્યું છે. સિંહણમાં પ્રાથમિક રીતે હડકવા જેવા લક્ષણો જોવા મળ્યા હોવાનું સામે આવતા વનવિભાગમાં ગંભીર ચિંતા વ્યાપી ગઈ છે.

5 લોકો પર હુમલો કરનાર વિફરેલી સિંહણ 12 કલાકે પાંજરે પૂરાઈ હતી

1 ઓક્ટોબરની રાત્રે આશરે 12 વાગ્યાના સુમારે તોરી ગામના મેહુલ વાજા અને ભગીરથ બસિયા પાંચમનો પ્રસંગ પતાવીને બાઇક પર પરત ફરી રહ્યા હતા. અરજણસુખ પાટિયા નજીક અચાનક સિંહણે તેમની પર હુમલો કરતા ગાડી નીચે પડી ગઈ હતી અને બંનેને હાથ-પગના ભાગે ઈજા પહોંચી હતી.

ત્યાર બાદ વહેલી સવારે સીમ વિસ્તારમાં કપાસના ખેતરમાં કામ કરી રહેલા વાડીમાલિક અતુલભાઈ સહિત વધુ બે સ્થાનિક પર આ જ સિંહણે અચાનક ધસી આવીને હુમલો કર્યો હતો. ઘટનાની જાણ થતાં જ વનવિભાગની 6થી 7 ટીમ સ્કેનિંગ માટે પહોંચી હતી. રેસ્ક્યૂ કામગીરી દરમિયાન સિંહણે વનવિભાગના ગાર્ડ અનિરુદ્ધ વાળા પર પણ હુમલો કરી દીધો હતો. સિંહણના હુમલામાં ઘાયલ થયેલા તમામ 5 લોકોને તાત્કાલિક 108 મારફતે અમરેલીની શાંતાબા સિવિલ હોસ્પિટલમાં સારવાર અર્થે દાખલ કરવામાં આવ્યા હતા.

વનકર્મી અનિરુદ્ધ વાળાએ જણાવ્યું હતું કે,

અમે સિંહણનો પીછો કરી રહ્યા હતા. તેણે મારા હાથ પર મોઢું મારી દીધું અને બેસી ગઈ. સ્ટાફે લાકડી મારી એટલે તે ઊભી થઈને ચાલી ગઈ.

વનવિભાગની ટીમે આશરે 12 કલાકની ભારે જહમત બાદ બપોરે 1 વાગ્યાની આસપાસ સિંહણને ટ્રાન્ક્યુલાઈઝ કરીને સફળતાપૂર્વક પાંજરે પૂરી હતી અને આગળની તપાસ માટે ક્રાંકચ એનિમલ કેર સેન્ટર ખસેડી હતી.

આંચકી આવ્યા બાદ સિંહણનું મોત, હડકવાની આશંકા

સિંહણને પાંજરે પૂર્યા બાદ તેની વર્તણૂક અને શારીરિક સ્થિતિ અસામાન્ય જણાતાં તેના પર સતત નજર રાખવામાં આવી રહી હતી. પ્રાણી તબીબો દ્વારા તપાસ અને સેમ્પલ લેવાની પ્રક્રિયા ચાલુ હતી તે દરમિયાન અચાનક સિંહણને આંચકી આવતાં તેની તબિયત વધુ લથડી હતી અને ટૂંક સમયમાં જ તેનું મોત થયું હતું.

શેત્રુંજી ડિવિઝનના DCF ચિરાગ અમીન અને ACF રાજન જાદવના જણાવ્યા મુજબ, સિંહણમાં હડકવાના પ્રાથમિક લક્ષણો સ્પષ્ટપણે જોવા મળ્યા હતા. જોકે, મોતનું સત્તાવાર અને ચોક્કસ કારણ લેબોરેટરી રિપોર્ટ આવ્યા બાદ જ જાહેર કરી શકાશે.

અમરેલી જિલ્લામાં શ્વાનની જેમ સિંહોમાં હડકવાના કિસ્સાઓ વધતાં વનવિભાગ સામે મોટો પડકાર ઊભો થયો છે. છેલ્લા દોઢ વર્ષ દરમિયાન રાજુલાના ધારેશ્વર, જાફરાબાદના મીતિયાળા અને બાબરકોટ વિસ્તારોમાં પણ આ જ પ્રકારે અસામાન્ય વર્તણૂક કરી માનવો પર હુમલા કરનાર 4 જેટલી સિંહણના મોત થઈ ચૂક્યા છે, જેમાં પણ હડકવાના રિપોર્ટ પોઝિટિવ આવ્યા હોવાનું જણાવાય છે.

સિંહો જેવા હિંસક વન્યજીવોમાં હડકવાનો રોગચાળો ફેલાવો એ આગામી સમય માટે અત્યંત ભયાનક સ્થિતિ સર્જી શકે છે, જેને લઈને વનવિભાગ દ્વારા ઉચ્ચ સ્તરે તપાસ અને આગોતરા પગલાં લેવાની કવાયત હાથ ધરવામાં આવી છે.

આ પણ વાંચો, ઉનામાં ઓસરીમાં સૂતેલા વૃદ્ધ પર સિંહનો હુમલો, કહ્યું- સાવજે પછાડ્યો, હાકલો કર્યો એટલે જતો રહ્યો પછી બીજો આવ્યો