Virat Kohli's team denies reports of paying Rs 5 crore for ashram visit

ఇంటర్నెట్‌డెస్క్‌: ఉత్తర్‌ప్రదేశ్‌లో బృందావనంలోని ప్రేమానంద మహారాజ్‌ ఆశ్రమాన్ని (రాధా కేలీ కుంజ్‌ ఆశ్రమం) సందర్శించినందుకుగానూ స్టార్ బ్యాటర్ విరాట్‌ కోహ్లీకి రూ.5 కోట్లు చెల్లించినట్లు కొన్ని కథనాలు ప్రచారం అవుతున్నాయి (Premanand Maharaj Ashram). దీనిపై కోహ్లీ టీమ్‌ స్పందించింది. ఆ కథనాలను ఖండించింది. అందులో ఎలాంటి వాస్తవం లేదని స్పష్టం చేసింది.

శ్రీకృష్ణ జన్మభూమి సంఘర్ష్‌ న్యాస్ ఫలహారి మహారాజ్ (దినేశ్ శర్మ) చేసిన వ్యాఖ్యలతో ఈ చెల్లింపు ప్రచారం మొదలైంది. తన పాపులారిటీని పెంచుకునేందుకు ప్రేమానంద మహారాజ్.. కోహ్లీ (Virat Kohli)కి డబ్బులు చెల్లించి, ఆశ్రమానికి రప్పించారని ఆరోపణలు చేశారు. దీనిపై కోహ్లీ బృందం తీవ్రంగా స్పందించింది. ‘‘ఆ ఆరోపణలు పూర్తిగా నిరాధారమైనవి. వాటిని మేం తీవ్రంగా ఖండిస్తున్నాం. తనకున్న ప్రగాఢ విశ్వాసం, గౌరవం కారణంగానే ప్రేమానంద మహారాజ్‌జీ ఆశ్రమాన్ని విరాట్‌ సందర్శిస్తుంటారు. ఈ తరహా వ్యాఖ్యలను ప్రచురించే ముందు వాస్తవాలను ధ్రువీకరించుకోవాలని, తగిన జాగ్రత్తలు తీసుకోవాలని మీడియాను కోరుతున్నాం’’ అని పేర్కొంది. విరాట్ కోహ్లీ, అనుష్క శర్మ తరచూ ఈ ఆశ్రమాన్ని సందర్శిస్తుంటారు.

ప్రేమానంద మహారాజ్ ఆశ్రమం వివాదాస్పద అంశాలతో నిలవడం ఇదే తొలిసారి కాదు. ఆయన శిష్యుడు రసిక్ దులారీ ఇటీవల భవనంపై నుంచి పడి, అనుమానాస్పద స్థితిలో ప్రాణాలు కోల్పోయారు. ఈ ఘటనపై దర్యాప్తు జరుగుతోంది.