Police Apprehend Fraud Gangs in Gujarat

અમદાવાદના કાલુપુર રેલવે સ્ટેશન પર મુસાફરોને પોતાની લાચારી બતાવી અને બનાવટી ચલણી નોટોના બંડલ બતાવીને નાણાં તેમજ કિંમતી સામાન પડાવી લેતી દિલ્હીની ગઠિયા ટોળકીના બે આરોપીઓને કાલુપુર પોલીસે ઝડપી પાડ્યા છે. આરોપીઓ ઓનલાઈન ગેમિંગના રવાડે ચઢી ગયા હોવાથી નાણાંની જરૂરિયાત પૂરી કરવા માટે આવી ઠગાઈ આચરતા હોવાનું સામે આવ્યું છે. પોલીસે પકડાયેલા આરોપીઓ પાસેથી રોકડ રકમ અને મોબાઈલ ફોન કબજે કરી કાયદેસરની કાર્યવાહી હાથ ધરી છે.

લાચારી બતાવી સોનાની ચેઈન, મોબાઈલ અને 77 હજાર પડાવી લીધા મહારાષ્ટ્રના રહેવાસી જયપ્રકાશ તિવારી કારીગર સાથે કામઅર્થે અમદાવાદ આવ્યા હતા. 7 સપ્ટેમ્બરે કાલુપુર રેલવે સ્ટેશને ટ્રેનની રાહ જોતી વખતે એક અજાણ્યા શખ્સે રાજેશ યાદવ તરીકે ઓળખ આપી શેઠે પગાર ન આપ્યો હોવાની લાચારી દર્શાવી હતી. તેણે પોતાની પાસે રૂ. 2 લાખ હોવાનું કહી બનાવટી નોટોનું બંડલ બતાવ્યું હતું અને દયા બતાવી ચા પીવડાવવાના બહાને બીજા સાગરીત સાથે મળીને ફરિયાદીનું માથું ભારે કરી સોનાની ચેઈન, મોબાઈલ અને ઓનલાઈન રૂ. 77 હજાર ટ્રાન્સફર કરાવી ફરાર થઈ ગયા હતા.

ઓનલાઈન ગેમિંગના રવાડે ચઢેલા દિલ્હીના બે આરોપીની ધરપકડ ભોગ બનનારની ફરિયાદના આધારે કાલુપુર પોલીસે તપાસ હાથ ધરીને દિલ્હીના તનવીર અંસારી અને સંજય શર્મા નામના બે આરોપીઓને ઝડપી પાડ્યા હતા. પોલીસ તપાસમાં તનવીર પાસેથી બે મોબાઈલ અને રૂ. 1 લાખ રોકડા તથા સંજય પાસેથી રૂ. 4,800 જપ્ત કરાયા છે. આરોપીઓ અગાઉ દિલ્હીમાં પણ ખિસ્સાકાતરુ તરીકેના ગુનામાં સંડોવાયેલા છે અને ઓનલાઈન ગેમિંગની ટેવ પૂરી કરવા માટે મુસાફરોને વિશ્વાસમાં લઈ બનાવટી નોટો બતાવી ઠગાઈ આચરતા હતા.